रिक्षावाल्याचा नादखुळा! ट्रॅफिकमध्ये अडकल्यानंतर काय केलं पाहा….संपूर्ण बातमी वाचून
अमित जाधव-संपादक
मोठमोठ्या फॉर्म्युला रेसिंग चालकांना लाजवेल असं तुफान ड्रायव्हिंग भारतातील रिक्षाचालक करतात असं म्हंटलं तर वावगं ठरणार नाही. अक्षरशः चाळणी झालेल्या रस्त्यातून वाट काढत, सुसाट वेगाने रिक्षा चालवत असताना आतल्या पॅसेंजरला एक रोलर कोस्टर राईडचा अनुभव देणं हे रिक्षा चालकांचं कमालीचं कसब म्हणता येईल. जेव्हा मोठमोठ्या फॅन्सी गाड्या ट्रॅफिक मध्ये अडकून पडतात तेव्हा विचारही करता येणार नाही अशा मार्गाने कट मारून वाहनांची कोंडी सोडवणारा रिक्षा चालक अनेक नोकरीदारांचे लेटमार्क वाचवण्याचं काम करतो. अशाच एका व्हायरल व्हिडीओची सोशल मीडियावर सध्या चर्चा सुरु आहे.
सोशल मीडियावर व्हायरल होणार व्हिडीओ मुंबई अहमदाबाद महामार्गावर विरार जवळील एका पुलावर काढण्यात आल्याचे समजत आहे. अगदी सामान्य वाटणाऱ्या या व्हिडिओमध्ये रस्ता ओलांडण्यासाठी बनवलेल्या एका ब्रिजवर चक्क अचानक रिक्षाची एंट्री होताना दिसत आहे. विशेष म्हणजे हा पादचारी पूल आहे म्हणजेच त्यावर जाण्यासाठी दोन्ही बाजूला जिना आहे, मग हा रिक्षावाला नेमका वर पोहचलाच कसा हा प्रश्न नेटकऱ्यांना पडला आहे. एखाद्या ऍडव्हेंचर पार्क मध्ये असणाऱ्या राईड प्रमाणे हा रिक्षाचालक बिनधास्त ड्रायव्हिंग करत आहे.
