ठाण्यातील धक्कादायक घटना,सासऱ्याने नाष्टा दिला नाही म्हणून सुनेला घातली गोळी……
अमित जाधव-संपादक
ठाणे : सुनेने न्याहारी दिली नाही या रागातून 76 वर्षीय सासऱ्याने तिची परवानाधारक रिव्हॉल्वरमधून गोळी झाडून हत्या केल्याची घटना ठाण्यातील राबोडी पोलीस स्टेशनच्या हद्दीत घडली आहे. या घटनेनंतर सासरा फरार झाला असून पोलीस त्याचा शोध घेत आहेत.
राबोडी पोलीस ठाण्याच्या हद्दीत ऋतू पार्क येथील विहंग शांतीवन या इमारतीत काशिनाथ पाटील हे त्यांच्या कुटुंबियांसोबत राहतात. गुरुवारी 14 एप्रिलला सकाळी साडेअकराच्या सुमारास त्यांची मोठी सून सीमा (वय 42 वर्षे) ही त्यांना चहा देण्यास गेली. यावेळी तिने न्याहारी दिली नाही. यावरुन काशिनाथ पाटील आणि त्यांची सून सीमा यांच्यात वाद झाला. त्यावेळी काशिनाथ यांनी त्यांच्या परवानाधारक रिव्हॉल्वरमधून सीमा यांच्या पोटात एक गोळी झाडली. या घटनेनंतर जखमी सीमा यांना उपचारांसाठी ठाण्यातील एका खाजगी रुग्णालयात दाखल करण्यात आलं. उपचारादरम्यान सीमा यांचा मृत्यू झाला.
