तोतया पोलिसाकडून ज्येष्ठ नागरिकांची लूट
डोंबिवली – दुचाकीवरुन चाललेल्या एका ज्येष्ठ नागरिक दाम्पत्याला तोतया पोलिसाने लुटल्याचा प्रकार शिळफाटा रस्त्यावरील निळजे गावाजवळ घडला आहे. हेलमेट कुठं आहे असं विचारत त्या तोतया पोलिसाने दाम्पत्याजवळील ३५ हजार रुपयांचा सोन्याचा ऐवज लुटला. या प्रकरणी किशनचंद मंगाला बागानी यांनी मानपाडा पोलीस स्थानकात तक्रार दाखल केली आहे. पोलिसांनी दिलेल्या माहितीनुसार, किशनचंद बागानी हे सेवानिवृत्त अधिकारी असून गुरुवारी सकाळी ते सहपत्नी दुचाकी वरुन निळजे गावातून काटई नाका दिशेने चालले होते. निळजे गावाच्या कमानी जवळ त्यांची दुचाकी एका इसमाने थांबवून तुम्ही हेलमेट घातले नाही. तुम्ही नियमभंग करत आहात, असे चढ्या आवाजात दम दिला. सार्वजनिक ठिकाणी रस्त्यावर सोन्याचे दागिने घालून फिरू नका, असे पोलीस, शासनातर्फे सतत सांगण्यात येते तरी तुमच्या पत्नीने सोन्याच्या बांगड्या घातले आहेत, असे म्हणत आरोपीने किशनचंद यांच्या पत्नीला दागिने काढण्यास सांगून ते तोतया पोलिसाने दिलेल्या कागदात गुंडाळून ठेवण्यास सांगितले. त्यानंतर पुढचा प्रवास करण्याची तंबी तोतयाने दाम्पत्याला दिली. कागदात दागिने गुंडाळून ठेवत असताना तोतया पोलिसाने हातचलाखी करुन बनावट दागिने दाम्पत्याच्या ताब्यात दिले आणि खरे दागिने स्वत:कडे घेऊन घटनास्थळावरुन पळ काढला. पुढे गेल्यानंतर पत्नीने पुन्हा दागिने तपासले त्यावेळी त्यांना दागिने बनावट असल्याचे दिसले. आपली फसवणूक झाल्याचे निदर्शनास आल्यावर किशनचंद यांनी मानपाडा पोलीस ठाण्यात तक्रार केली. पोलीस उपनिरीक्षक के. डी. गांगुर्डे पुढील तपास करत आहेत.
