गणेशमंडळांनी मतदार जनजागृतीसंबंधीचे बॅनर* *लावून नागरिकांमध्ये जनजागृती करावी* *-जिल्हाधिकारी अशोक शिनगारे यांचे आवाहन…,

ठाणे, दि. 15  – गणेशोत्सवाच्या माध्यमातून मतदारांमध्ये जनजागृती निर्माण व्हावी, यासाठी महाराष्ट्र राज्याच्या मुख्य निवडणूक अधिकारी कार्यालयाने पुढाकार घेतला आहे. नागरिकांपर्यंत मतदान व मतदार नोंदणीसंदर्भातील माहिती पोहचावी यासाठी गणेशोत्सव मंडळांना मुख्य निवडणूक अधिकारी कार्यालयाने बॅनरचे साहित्य गुगल लिंकवर उपलब्ध करून दिले आहे. ठाणे जिल्ह्यातील गणेश मंडळांनी या लिंकवरील साहित्य वापरून मतदारांमध्ये जनजागृती करण्यासाठी हातभार लावावा, असे आवाहन जिल्हा निवडणूक अधिकारी तथा जिल्हाधिकारी अशोक शिनगारे यांनी केले आहे.

मतदानाविषयी मतदारांमध्ये जनजागृती व्हावी, मतदार नोंदणीमध्ये नागरिकांनी विशेषतः नवयुवक व ज्यांचे नाव मतदार यादीमध्ये नाही, अशा नागरिकांनी नोंदणी करावी करावी यासाठी जनजागृती होणे आवश्यक आहे. गणेशोत्सव काळात विविध गणेश मंडळे ही सामाजिक देखावे करत असतात. त्यावेळी मतदार जनजागृती विषयक बॅनर लावल्यास नागरिकांपर्यंत योग्य तो संदेश पोहचेल. यासाठी महाराष्ट्र राज्याच्या मुख्य निवडणूक अधिकारी कार्यालयाने मतदार जनजागृतीसंदर्भातील बॅनरचा नमुना https://drive.google.com/drive/u/2/folders/1Lv7cbhdwi800wPPNGJlV-7oZyukEc0S2, या गुगल लिंकवर उपलब्ध करून दिला आहे.
ठाणे जिल्ह्यातील गणेशोत्सव मंडळांनी हे बॅनर प्रिंट करून आपल्या मंडळामध्ये लावावेत, जेणेकरून मतदानासंबंधी व मतदार नोंदणीसंबंधी नागरीक सजग होतील. जिल्ह्यातील जास्तीत जास्त मंडळांनी या राष्ट्रीय कार्यात सहभागी व्हावे, असे आवाहन जिल्हाधिकारी श्री. शिनगारे व उपजिल्हा निवडणूक अधिकारी अर्चना कदम यांनी केले आहे.