कल्याण येथे 9 वर्षाच्या चिमुरडीवर बलात्कार करून केली हत्या ,सुयोग्य तपास करत काही दिवसातच कल्याण पोलिसांनी अटक करून आरोपीला केलं जेरबंद…

कल्याण येथे 9 वर्षाच्या चिमुरडीवर केला बलात्कार करून केली हत्या ,सुयोग्य तपास करत काही दिवसातच कल्याण पोलिसांनी अटक करून आरोपीला केलं जेरबंद…

कल्याण : नऊ वर्षाच्या चिमुरडीवर बलात्कार
करून तिची निर्घृण हत्या केल्याची घटना पंधरा दिवसापूर्वी महात्मा फुले पोलीस ठाण्याच्या हद्दीत घडली होती. महात्मा फुले पोलिसांनी या घटनेचा शोध लावला असून आरोपीला ताब्यात घेतले आहे. दरम्यान आरोपीला यापूर्वी देखील बाल लैंगिक अत्याचार केल्याप्रकरणी 10 वर्षांच्या सश्रम कारावासाची शिक्षा सुनावण्यात आली होती. कारागृहातून सुटून आलेल्या या आरोपीने पुन्हा तेच कृत्य केल्याने एकच खळबळ उडाली आहे.

मूळचा मध्यप्रदेश येथे असणारा सुरज शंकर सिंग उर्फ वीरेंद्र शंकर मिश्रा (32) हा आरोपी सध्या भिवंडी परिसरात राहत होता. बाल लैंगिक अत्याचार केल्याने 10 वर्षांचा तुरुंगवास भोगणाऱ्या सूरज उर्फ विरेंद्रची 14 नोव्हेंबरला तुरूंगातून सुटका झाली होती. त्यानंतर नव्याने आयुष्य सुरू करायचे सोडून फिरस्ता असणाऱ्या विरेंद्रची नजर कल्याण येथील महात्मा फुले परिसरातील एका इमारतीच्या खालील फुटपाथवर झोपणाऱ्या 9 वर्षांच्या चिमुरडीवर पडली. आपल्या बाबांच्या कुशीत सुरक्षित झोपलेल्या चिमुरडीला त्याने हळूच उचलून बाजूला केले. त्यानंतर या चिमुरडीला काही अंतरावर नेत त्याने तिच्यावर बलात्कार केला आणि त्यानंतर तिच्या गळ्यावर चाकूने वार करत तिचा निर्दयपणे खून केला. या प्रकरणाची माहिती मिळताच महात्मा फुले पोलिसांनी धाव घेत जागेची पाहणी करत तपासाला सुरुवात केली. यासंदर्भात त्यांनी एका संशयित अल्पवयीन मुलाला ताब्यात घेतले होते. मात्र तपासाचा वेग वाढल्यानंतर हे कृत्य करणारा तरुण वेगळा असल्याचे त्यांचा लक्षात आले. सीसीटीव्ही चा आधार घेत त्याने या गुन्ह्याला जबाबदार असणाऱ्या सूरज उर्फ विरेंद्रचा कसोशीने शोध घेतला. त्याचा शोध
घेण्यासाठी महात्मा फुले पोलिसांनी विविध 10 पथके तयार केली होती. यावेळी त्याचे मूळ गाव असणाऱ्या मध्य प्रदेशात पोलिसांनी एक पथक पाठवले होते तर भिवंडी येथील सोनाळे गावात एक पथक पाठवले होते. मात्र सूरज उर्फ विरेंद्रला सोनाळे गावातुनच अटक केल्याची माहिती महात्मा फुले पोलीस ठाण्याचे वरिष्ठ पोलीस निरीक्षक अशोक होनमाने यांनी दिली. विशेष म्हणजे या सोनाळे परिसरातील बकरीच्या गोठ्यात जाऊन अंधाराचा फायदा घेत त्याने बकरीवर देखील अनैसर्गिक अत्याचार करण्याचा प्रयत्न केला होता. यावेळी आजूबाजूच्या नागरिकांनी त्याला चांगलाच चोप दिल्याचेही त्यांनी सांगितले. एकूणच विरेंद्रने त्याच्या विकृतपणाचा कळस गाठल्याचे समोर आले आहे. पोलीस उपायुक्त सचिन गुंजाळ, सहाय्यक पोलीस आयुक्त उमेश माने पाटील, वरिष्ठ पोलिस निरीक्षक अशोक होनमाने यांच्या मार्गदर्शनाखाली महात्मा फुले पोलीस ठाणाच्या सर्वच कर्मचाऱ्यांनी या गुन्ह्याची उकल केली असून अधिक तपास करत आहेत.