शिवसेना खासदार विनायक राऊतांना पोलिसांनी घेतलं ताब्यात; बारसू परिसरात वातावरण तापलं..

राजापूरमधील प्रस्तावित बारसू सोलगाव रिफायनरी वातावरण तापलं आहे. रिफायनरीच्या माती परीक्षणासाठी सर्वेक्षण सुरू आहे. तर ग्रामस्थांना या सर्वेक्षणाला विरोध आहे. आणि त्यांनी आक्रमक पवित्रा घेतला आहे. बारसूतील आंदोलनात सहभागी होण्यासाठी निघालेल्या शिवसेना ठाकरे गटाचे खासदार विनायक राऊत यांना पोलिसांनी ताब्यात घेतलं आहे.

पोलिसांना बारसूला जाण्यापासून रोखल्याने विनायक राऊत यांनी ठिय्या आंदोलन सुरू केलं. यामुळे वातावरण तापवण्याची चिन्ह आहेत. जिल्ह्यात मनाई आदेश लागू करण्यात आले आहेत. कायदा व सुव्यवस्थेचा प्रश्न निर्माण होऊ नये म्हणून यापूर्वीच हे मनाई आदेश जिल्हा पोलीस प्रशासनाकडून लागू करण्यात आलेत.

मनाई आदेशाची माहिती देऊन खासदार विनायक राऊत यांना पुढे न जाण्याची विनंती पोलिसांनी केली. राजापूर येथे जिल्हा पोलीस अधीक्षक धनंजय कुलकर्णी यांनी विनायक राऊत यांना ही विनंती केली होती. मात्र तरीही खासदार विनायक राऊत आणि त्यांच्या सहकाऱ्यांनी ग्रामस्थांसमवेत ठिय्या आंदोलन सुरू केले. अखेर कायदा सुव्यवस्थेचा प्रश्न निर्माण होऊ नये म्हणून बारसू सडा परिसरातून खासदार विनायक राऊत यांच्यासह आठ ते नऊ जणांना पोलिसांनी ताब्यात घेतलं आहे.