ठाणे शहरात २६ सप्टेंबर ते ५ ऑक्टोबर दरम्यान ‘माता सुरक्षित तर घर सुरक्षित’ अभियान , सर्व महिलांनी सहभागी होण्याचे प्रशासक तथा महापालिका आयुक्त डॉ. विपिन शर्मा यांचे आवाहन…

ठाणे शहरात २६ सप्टेंबर ते ५ ऑक्टोबर दरम्यान ‘माता सुरक्षित तर घर सुरक्षित’ अभियान

सर्व महिलांनी सहभागी होण्याचे प्रशासक तथा महापालिका आयुक्त डॉ. विपिन शर्मा यांचे आवाहन

टेंभी नाका येथे विशेष आरोग्य शिबीर

ठाणे (२४): ठाणे महानगरपालिका क्षेत्रात २६ सप्टेंबर ते ०५ ऑक्टोबर दरम्यान ‘माता सुरक्षित तर घर सुरक्षित ’ अभियान राबविण्यात येणार आहे. या राष्ट्रीय आरोग्य अभियानांतर्गत १८ वर्षावरील महिला, माता, गरोदर महिला यांची सर्वांगीण तपासणी पालिका क्षेत्रातील सर्व प्राथमिक आरेाग्य केंद्रांवरती करण्यात येणार आहे. महापालिका कार्यक्षेत्रातील सर्व महिलांनी या अभियानात सहभाग घ्यावा असे आवाहन ठाणे महापालिकेचे प्रशासक तथा महापालिका आयुक्त डॉ. विपिन शर्मा यांनी केले आहे.

टेंभी नाका येथे आरोग्य शिबीर

या अभियानातील एक उपक्रम म्हणून ठाणे महानगरपालिकेच्या सार्वजनिक आरोग्य विभागातर्फे टेंभी नाका येथील नवरात्रोत्सवात महिलांसाठी विशेष आरोग्य शिबीर २६ सप्टेंबर ते ०५ ऑक्टोबर या काळात आयोजित करण्यात आले आहे. टेंभी नाका नवरात्रोत्सवात हजारो महिला देवीच्या दर्शनासाठी येतात. त्यांना आरोग्य तपासणीचा लाभ मिळावा यासाठी ‘माता सुरक्षित तर घर सुरक्षित’ या अभियानात हे शिबीर आयोजित करण्यात आले आहे.

टेंभी नाका येथील शिबिरात तज्ज्ञ डॉक्टरांमार्फत महिलांची आरोग्य तपासणी केली जाईल. त्याशिवाय, महिलांची बीएमआय, हिमोग्लोबिन, रक्तातील साखरेचे प्रमाण, मॅमोग्राफी, एक्स रे, ईसीजी यासारख्या तपासण्या विनामुल्य केल्या जातील. तसेच, रुग्णाच्या आवश्यकतेनुसार महापालिकेच्या रुग्णालयात संदर्भ सेवा देऊन पुढील उपचार करण्यात येतील.

मान्यवर स्त्रीरोग रोग तज्ज्ञ, बालरोग तज्ज्ञ यांचा सहभाग

या अभियानांतर्गत १८ वर्षावरील सर्व महिला, माता, गरोदर महिला यांची आरोग्य तपासणी , प्रतिबंधात्मक आणि उपचारात्मक आरोग्य सुविधा उपलब्ध करून देण्यात येणार आहे. या अभियानासाठी राजीव गांधी रुग्णालयाचे स्त्रीरोग तज्ज्ञ, बालरोग तज्ज्ञ तसेच ठाण्यातील मान्यवर स्त्रीरोग रोग तज्ज्ञ, बालरोग तज्ज्ञ आपली सेवा देणार आहेत. तसेच महिलांना व बालकांना फोलीक ॲसीड, कॅल्शीअम, आयर्न अशी आवश्यकतेनूसार औषधेही देण्यात येणार आहे.

या अभियानांतर्गत समुपदेशनही केले जाणार आहेत. त्यात, गर्भधारणापूर्व काळजी आणि मानसिक आरोग्य, स्तनपान, व्यसनमुक्ती, पोषण या विषयांचा समावेश आहे. या अभियानात, सोनोग्राफी शिबीरही घेण्यात येणार आहे. यामध्ये चेस्ट एक्सरे, आवश्यकतेनूसार मॅमोग्राफी करण्यात येणार आहे. तसेच महिला व मातांचे हिमोग्लोबीन, रक्त-लघवी यांच्या तपासण्या करण्यात येणार आहे. माता-बालकांचे लसीकरणही करण्यात येणार आहे. ३० वर्षावरील स्त्रीयांचे कर्करोग, रक्तदाब, मधुमेह स्क्रींनिंग करण्यात येणार आहे.
‘माता सुरक्षित तर घर सुरक्षित ’ या अभियानात सर्व महिलांनी आपली तपासणी करून घ्यावी, असे
आवाहन ठाणे महापालिकेचे प्रशासक तथा महापालिका आयुक्त डॉ. विपिन शर्मा यांनी केले आहे.
……………………………………….